ਤੇਰੇ ਲਈ ਇੱਕ ਕਵਿਤਾ ਲਿਖਦਿਆਂ

 ਤੇਰੇ ਲਈ ਇੱਕ ਕਵਿਤਾ ਲਿਖਦਿਆਂ ਕਈ ਯੁਗ ਬੀਤੇ 
ਕਈ ਧਰਤੀਆਂ ਸੂਰਜ ਉਗਮੇ ਬਿਨਸੇ 
ਯੁਗਾਂ ਯੁਗਾਂ ਤੋਂ ਕਲਮ ਹੈ 
ਚਲਦੀ ਯੁਗਾਂ ਯੁਗਾਂ ਤੋ ਪੈਰ  
ਨਾ ਕਲਮ ਦੀ ਕਵਿਤਾ ਮੁੱਕਦੀ 
ਨਾ ਪੈਰਾਂ ਦੀ ਵਾਟ 

ਲਖ ਧਰਤੀਆਂ ਭਰ ਆਈ ਹਾਂ
ਲਿਖ ਲਿਖ ਕਾਲੀਆਂ ਕਰ ਆਈ ਹਾਂ 
ਅਕਾਸ਼ਾਂ ਵਿਚ ਹੀਰੇ ਜੜ ਆਈ  ਹਾਂ 
ਸਬ ਸ਼ਬਦਾਂ ਨਾਲ ਮੜ ਆਈ ਹਾਂ 
ਮੇਰੀ ਕਵਿਤਾ ਕਿੰਨੀ ਲੰਬੀ 
ਕਿੰਨਾ ਹੈ ਤੇਰਾ ਵਿਸਥਾਰ 

ਤੇਰੀ ਵਿਥਿਆ ਹਵਾ ਦਾ ਪੱਲੂ 
ਮੇਰੀ ਵਿਥਿਆ ਭੋਇੰ ਭਾਰ 
ਰਹਿ ਰਹਿ ਕੀਤੀ ਕਵਿਤ ਕਹਾਣੀ
ਆਖ ਨਾ ਹੋਇਆ ਤੇਰਾ ਆਕਾਰ 
ਕਿਹੜੇ ਦੇਸਾਂ ਦੀ ਮੈ ਰਾਣੀ
ਤੂ ਕੌਣ ਦੇਸ ਦਾ ਰਾਜ ਕੁਮਾਰ 

ਰੋਕ ਲੈ!

ਰੋਕ ਲੈ!
ਮੇਰੇ ਮਥੇ  ਨੂੰ
ਹਥਾਂ  ਨਾਲ
ਹੋਠਾਂ  ਨਾਲ

ਦੇਖ ਇਸਦੇ ਪੈਰ ਨਿਕਲ ਰਹੇ ਨੇ .....

ਸਾਜਿਸ਼

ਮੈਂ ਪੁਛਿਆ ਸੀ
ਕਿਹੋ ਜਿਹਾ ਹੋਣਾ ਚਾਹੀਦਾ
ਪਤੀ ਪਤਨੀ ਦਾ ਰਿਸ਼ਤਾ

ਤੂੰ ਕਿਹਾ ਸੀ
ਰੂਮ-ਮੇਟਸ ਵਰਗਾ
ਜਿਵੇਂ ਹੋਸਟਲ ਵਿਚ ਹੁੰਦਾ

ਆਪਣੀ-ਆਪਣੀ ਬਾਲਟੀ
ਆਪੋ - ਆਪਣਾ ਸਾਬਣ
ਆਪੋ -ਆਪਣਾ ਤੌਲੀਆ

ਵਖੋ-ਵਖ ਅਲਮਾਰੀ
ਅਲਮਾਰੀ ਦੇ ਵਖੋ ਵਖਰੇ ਤਾਲੇ
ਮੁਖ ਦਰਵਾਜੇ ਦਾ ਇੱਕ ਤਾਲਾ
ਤੇ ਆਪੋ ਆਪਣੀ ਚਾਬੀ

ਮੈਂ ਵੀ ਸੋਚਦੀ ਸਾਂ
ਬਿਲਕੁਲ ਇਸੇ ਤਰਾਂ

ਅਸੀਂ ਚਾਹਿਆ  ਤੇ ਰੂਮ-ਮੇਟਸ ਬਣ ਗਏ

ਫਿਰ ਸਾਜਿਸ਼ ਕੀਤੀ
ਸਾਡੇ ਕਪੜਿਆਂ ਨੇ
ਤੇ ਇੱਕੋ ਅਲਮਾਰੀ ਵਿਚ ਜਾ ਟਿਕੇ

ਇਹੀ ਸਾਜਿਸ਼-
ਤੌਲੀਏ ਸਾਬਣ ਬਰਤਨਾ ਸਬ ਨੇ ਕੀਤੀ

ਸਭ ਤੋ ਵੱਡੀ ਸਾਜਿਸ਼-
ਤਾਲਿਆਂ ਨੇ ਕੀਤੀ
ਤੇ ਚਾਬੀਆਂ ਨੇ ਦਿੱਤਾ-
ਤਾਲਿਆਂ ਦਾ ਸਾਥ

ਚਾਬੀਆਂ ਤੇ ਤਾਲਿਆਂ  ਲਈ ਲੜਦੇ
ਅਸੀਂ ਪਤਾ ਨੀ ਕੀ ਹੋ ਗਏ
ਖੁਰ ਗਿਆ ਰੂਮ-ਮੇਟਸ ਹੋਣ ਦਾ ਸੁਪਨਾ ....

ਇੰਤਜ਼ਾਰ

ਇੰਤਜ਼ਾਰ (੧)

ਇੰਤਜ਼ਾਰ ਦੀ ਤਣੀ ਹੋਈ ਰੱਸੀ 'ਤੇ ਤੁਰਦਿਆਂ
ਕਦੇ ਸੱਜਾ ਪੱਬ ਬਚਾਉਂਦਾ
ਕਦੇ ਖੱਬਾ

ਕਦੇ ਕਦੇ ਪੈਰਾਂ ਦੇ ਨਹੁੰ ਵੀ ਬਚਾ ਲੈਂਦੇ

ਜਦੋਂ ਜਿਸਮ ਇਨਕਾਰੀ ਹੁੰਦਾ
ਮੈਂ ਸਾਹਾਂ ਨਾਲ ਫੜਦੀ ਹਾਂ ਰੱਸੀ
ਤੇ ਹਵਾ ਵਿਚ ਲਟਕ ਜਾਂਦੀ ਹਾਂ

ਹੁਣ ਹੁੰਗਾਰਾ ਨਾ ਭਰ

ਤੇਰੇ 'ਹੂੰ' ਦੀ ਗੂੰਜ ਵੀ
ਮੇਰਾ ਸੰਤੁਲਨ ਵਿਗਾੜਦੀ....

ਇੰਤਜ਼ਾਰ (੨)

ਇੰਤਜ਼ਾਰ ਦੀ ਤਣੀ ਹੋਈ ਰੱਸੀ 'ਤੇ ਤੁਰਦਿਆਂ
ਨਾ ਯਾਦਾਂ ਨਾਲ ਹੁੰਦੀਆਂ
ਨਾ ਸੁਪਨੇ

ਬਸ ਇੱਕ ਡਰ ਹੁੰਦਾ ...
ਰੱਸੀ ਤੋ ਤਿਲਕਣ ਦਾ
ਖਾਈ ਵਿਚ ਡਿੱਗਣ ਦਾ

ਮਾਫ਼ ਕਰੀਂ !
ਇਸ ਰੱਸੀ ਤੇ ਤੁਰਦਿਆਂ
ਜਦੋਂ ਚੀਕ ਵੀ ਨਿਕਲੀ
ਮੇਰੇ ਨਾਲ ਡਰ ਸੀ
ਤੇਰਾ ਪਿਆਰ ਨਹੀਂ ...

ਇੰਤਜ਼ਾਰ (੩)

ਇੰਤਜ਼ਾਰ ਦੀ ਕਸੀ ਹੋਈ ਰੱਸੀ 'ਤੇ
ਨਟੀ ਵਾਂਗ ਤੁਰਦਿਆਂ

ਮੈਂ ਬਾਹਾਂ ਹਵਾ ਵਿਚ ਫੈਲਾ ਦਿੱਤੀਆਂ

ਹਵਾ ਨੇ ਕਿਹਾ ..
ਮੇਰਾ ਨਾ ਭਾਰ ਨਾ ਜਿਸਮ
ਨਾ ਵਸਲ ਨਾ ਹਿਜ਼ਰ

ਮੈਂ ਹਵਾ ਵਿਚ ਘੁਲ ਗਈ

ਰੱਸੀ ਦੇ ਦੂਜੇ ਪਾਸੇ
ਤੂੰ ਹਥ ਵਧਾਈ ਖੜਾ ਸੀ

ਮੈਂ ਤੇਰੀਆਂ ਉਂਗਲਾ ਦੀਆਂ ਵਿਰਲਾਂ ਥਾਣੀ ਨਿਕਲ ਗਈ ....

ਇੰਤਜ਼ਾਰ (੪)

ਇੰਤਜ਼ਾਰ ਦੀ ਕਸੀ ਹੋਈ ਰੱਸੀ ਤੋਂ ਉਤਰਕੇ ਹੀ
ਸੰਭਵ ਹੋਈ
ਨਟੀ ਦੇ ਸਫਰ ਦੀ ਕਵਿਤਾ.....

ਰਾਤ ਨੂੰ ਕਹੋ

ਰਾਤ ਨੂੰ ਕਹੋ
ਮੇਰੇ ਅਸਮਾਨ ਤੇ ਨਾ ਉੱਤਰਿਆ ਕਰੇ
ਅੱਜ ਕੱਲ੍ਹ ਮੇਰਾ ਸੂਰਜ ਵੀ ਕਾਲੇ ਰੰਗ ਦਾ ਹੈ

ਤੇ ਮੈਂ ਜਾਗਦਿਆਂ ਵੀ ਸੁੱਤੀ ਹੁੰਦੀ ਹਾਂ ....

ਖਾਲੀ ਲਿਫ਼ਾਫ਼ਾ

ਵਕ਼ਤ ਦੀ ਟਹਿਣੀ ਵਿਚ ਫਸਿਆ
ਇੱਕ ਖਾਲੀ ਲਿਫ਼ਾਫ਼ਾ ਹਾਂ
ਪਤਾ ਨੀ ਕਿਸ ਕਿਸ
ਕੀ ਕੀ ਖਾਕੇ
ਖਾਲੀ ਸੁੱਟ ਦਿੱਤਾ ਹੈ .....

ਖਾਮੋਸ਼ੀ

ਖਾਮੋਸ਼ੀ ਦਾ ਕੀ ਹੈ
ਇਹ ਤਾ ਉੜਦਾ ਪੰਛੀ ਹੈ
 ਕਦੇ ਇਸ ਟਹਿਣੀ
ਕਦੇ ਉਸ ਟਹਿਣੀ

ਮੈਂ ਵੀ ਖਿੜਕੀ ਖੋਲ ਹੈ ਦਿੱਤੀ
ਤੇ ਚੋਗਾ ਤਾਂ ਤੂੰ ਪਾ ਦਿੱਤਾ ਸੀ ....